KLEI DUÊ HGŬM MGUÔP

KLEI DUÊ IÊU MTHƯR Ơ phung amuôn êkei adei mniê, ơ phung hriê čhưn ênguê ti anei, prao êngao kâo dlăng kơ di ih msĕ si kbao dlăng kơ čư̆. Êngư̆ êngăm msĕ si ƀuôn dlăng kơ tue, knga msĕ mmao, ală msĕ mtŭ, blŭ msĕ si ngiêk čap klap blĕ amâo lŏ thâo ruê̆.

Ti nei kâo hƀrơ̆k snăk kâo ƀuh mnga ktơr, kâo hdơr êdi mi ma kâo ƀuh mnga plei, kâo ƀuh ênŭm phung ayŏng amai adei, drei dŭm nei kơ dih. Ƀăt năng dôk čoh bruă ngă hma ti lăn hrah, knah mñê, ti ala čar Êđêga drei msĕ si đưm êlâo. Ƀiădah drei klah hĕ bŭng ti ana, bi klah mtei pha ti êpak, bi klah amĭ anak mâo bŏ hruê, phung drei đuê̆ ti čư̆, ăt hŏng tian dôk êpa, đuê̆ găn êa hŏng ai tiê dôk êmăn, đuê̆ asăn asei mlei. Kơyua Yuăn tiŏ mblah drei hlăm sang, tiŏ wang hlăm dliê, lu phung drei djiê hlăm troh, djiê êngoh êăt, dôk djiê jơ̆ng amâo mâo pô bi kpă, ală amâo mâo pô dluih, amâo mâo pô kkuê̆ brei kƀut msat, amâo mâo pô wat brei gơ̆ng kŭt, gơ̆ng khlao. Bi ară anei hin êmô ăt dôk rŭng bŏ êngao, kbao rŭng bŏ dliê, anak êkei mniê amĭ ama drei dôk hia bŏ ƀuôn êlan, yuăn dôk čăm hlăm sang mnă, akă hlăm sang war, yuăn dôk čăm boh akŏ tơl êka, mra bŏk, hŏk êrah mơ hing ti lăn. Kâo iêu mthưr kơ jih jang đang kăt, anak Êđê Jarai, anak Kaho Mnông, Mơ Nar, Sơtiêng, bi hlue bĕ drei sa kru kgă, bi mă sa kru jông, hlue mă knŏng sa asăp kbông aê khua păn akŏ. Bi êmô đăm lŏ bi klah phă êngao, kbao klah phă dliê đăm lŏ duah bi hlue êlan arăng điâo hnuă. Kơyuadah êlan gŭ arăng dôk ƀêč na nao đông. Bi êlan dlông arăng dôk kƀêč k’hô, êlan phung drei tuôm êrô êbat phung mduôn khua jih ai knăl, kâo dôk lač kơ diih ơ čô, mtô brei kơ hđeh kreh kruñ. Mniê djăp drei, êkei djăp pô, êmô djăp mgăt, leh anăn di ih amiêt khua awa mduôn alê čăt êlâo kbâo hđăp, kdrăp khil đao mơ̆ng đưm êlâo. Kâo mtă kơ di ih tơdah hiu hlăm čư̆ đăm duah pĕ ôh boh sač,di ih hiu hlăm tač đăm duah rač boh êmiê. Kơyuadah dliê arăng dliê gung k’hô, kâo huĭ kơ di ih alê duah drôk, arôk tlŏ djŏ krŏng pô hma dôk ƀêč, kâo čiăng kơ di ih asah kju bi mta, hna bi ktang, klei mblah wang bi mgăl anôk, hna điêt, kniêt mrâo, brăm êtuh êbâo bi djăp asei. Ară anei hin Yuăn dôk mdjiê hđeh hlei pô kăp yap brei ênoa, Yuăn mdjiê khua hlei pô kăp yap kđi, tơdah djiê di ih mgi aguah sa, êla aguah dih hlei pô kăp yap brei ênoh. Apui ƀơ̆ng leh truh ti anoh, bi êa đoh leh truh ti hang. Mnuih ƀuôn sang drei dôk rai knap, dôk jih sa prai, dôk rai sa prâk, adôk kơ dlăk msĕ si êa joa. Kâo dôk huĭ soh êyông yŭ hlei pô srăng, kăp lŏ bi mkŏ. Tơdah soh êyông ngŏ hlei pô sơrăng kăp lŏ bi mkra, êdah čiăng anih hlei pô sơrăng kăp lŏ bi mgăl. Kơyuadah sa ƀĕ kyâo amâo dưi jing sa boh sang, sa čăp anuah hlang amâo dưi jing sa boh hdjiê, sa čô êkei mniê ñu amâo dưi jing sa boh ƀuôn prong. Kâo čiăng kơ drei nao bi krŭ, kgŭ bi krêč, ƀêč sa anăn, leh anăn drei bi mdlưh sa anăn. PÔ ČIH Y QUYNH BDAP